yaa mujhe afsar-e-shaahaa na banaayaa hotaa

yaa mujhe afsar-e-shaahaa na banaayaa hotaa
yaa meraa taaj gadaayaa na banaayaa hotaa

[afsar-e-shaahaa=royal officer; gadaaya=like a beggar]

Khaak_saarii ke liye garache banaayaa thaa mujhe
kaash Khaak-e-dar-e-jaanaa.N na banaayaa hotaa

nashaa-e-ishq kaa gar zarf diyaa thaa mujh ko
umr kaa tang na paimaanaa banaayaa hotaa

[zarf=knowledge; tang=short]

apanaa diivaanaa banaayaa mujhe hotaa tuune
kyo.n Khirad_mand banaayaa na banaayaa hotaa

sholaa-e-husn chaman me.n na dikhaayaa us ne
varanaa bul_bul ko bhii paravaanaa banaayaa hotaa

roz-e-mamuuraa-e-duniyaa me.n Kharaabii hai 'Zafar'
aisii bastii se to viiraanaa banaayaa hotaa

vo behisaab jo pii ke kal sharaab aayaa

vo behisaab jo pii ke kal sharaab aayaa
agarche mast thaa mai.n par mujhe hijaab aayaa

idhar Khayaal mere dil me.n zulf kaa guzaraa
udhar vo khaataa huaa dil me.n pech-o-taab aayaa

Khayaal kis kaa samaayaa hai diidaa-o-dil me.n
na dil ko chain mujhe aur na shab ko Khvaab aayaa

tum na aaye ek din kaa vaadaa kar do din talak

tum na aaye ek din kaa vaadaa kar do din talak
ham pa.De ta.Dapaa kiye do do pahar do din talak

[talak = till]

dard-e-dil apanaa sunaataa huu.N kabhii jo ek din
rahataa hai us naazanii.n ko dard-e-sar do din talak

dekhate hai.n Khvaab me.n jis din kisuu kii chashm-e-mast
rahate hai.n ham do jahaa.N se beKhabar do din talak

[kisuu = kisii = someone; chashm-e-mast = intoxicating eyes]

gar yaqii.n ho ye hame.n aayegaa tuu do din ke baad
to jiye.n ham aur is ummiid par do din talak

[yaqii.n = believe/trust]

kyaa sabab kyaa vaastaa kyaa kaam thaa batalaa_iye
ghar se jo nikale na apane tum "Zafar" do din talak

[sabab = reason]

the kal jo apane ghar me.n vo mahamaa.N kahaa.N hai.n

the kal jo apane ghar me.n vo mahamaa.N kahaa.N hai.n
jo kho gaye hai.n yaa rab vo ausaa.N kahaa.N hai.n

aa.Nkho.n me.n rote rote nam bhii nahii.n ab to
the maujazan jo pahale vo tuufaa.N kahaa.N hai.n

kuchh aur Dhab ab to hame.n log dekhate hai.n
pahale jo ai "Zafar" the vo insaa.N kahaa.N haiN

subah ro ro ke shaam hotii hai

subah ro ro ke shaam hotii hai
shab ta.Dap kar tamaam hotii hai

saamane chashm-e-mast ke saaqii
kis ko parvaah-e-jaam hotii hai

ko_ii Gunchaa khilaa ke bul-bul ko
bekalii zar-e-daam hotii hai

ham jo kahate hai.n kuchh ishaaro.n se
ye Khataa laa-kalaam hotii hai

shamashiir barahanaa maa.Ng Gazab baalo.n kii mahak phir vaisii hai

shamashiir barahanaa maa.Ng Gazab baalo.n kii mahak phir vaisii hai
juu.De kii gundhaavat bahar-e-Khudaa zulfo.n kii laTak phir vaisii hai

har baat me.n us ke garmii hai har naaz me.n us ke shoKhii hai
aamad hai qayaamat chaal bharii chalane kii pha.Dak phir vaisii hai

maharam hai habaab-e-aab-e-ravaa suuraj kii kiran hai us pe lipaT
jaalii kii ye kuratii hai vo balaa goTe kii dhanak phir vaisii hai

vo gaaye to aafat laaye hai sur taal me.n leve jaan nikaal
naach us kaa uThaaye sau fitane ghungharuu kii chhanak phir vaisii hai

pas-e-marg mere mazaar par jo chiraaG kisii ne jalaa diyaa

pas-e-marg mere mazaar par jo chiraaG kisii ne jalaa diyaa
use aah daaman-e-baad ne sare shaam hii se bujhaa diyaa

mujhe dafn karanaa tuu jis gha.Dii to ye us se kahanaa ki ai parii
vo jo teraa aashiq-e-zaar thaa tah-e-Khaak use dabaa diyaa

dam-e-Gusl se mere peshtar use ham_damo.n ne ye soch kar
kahii.n jaave us kaa na dil dahal merii laash par se haTaa diyaa

merii aa.Nkh jhapakii thii ek pal mere dil ne chaahaa ki uTh ke chal
dil-e-beqaraar ne o miyaa.N vahii.n chuTakii leke jagaa diyaa

zaraa un kii shoKhii to dekhiye liye zulf-e-Kham_shudaa haath me.n
mere piichhe aaye dabe-dabe mujhe saa.Np kah ke Daraa diyaa

mai.n ne dil diyaa mai.n ne jaa.N dii magar aah! tuune na qadr kii
kisii baat ko jo kahaa kabhii use chuTakiyo.n me.n u.Daa diyaa

na kisii kii aa.Nkh kaa nuur huu.N na kisii ke dil kaa qaraar huu.N

na kisii kii aa.Nkh kaa nuur huu.N na kisii ke dil kaa qaraar huu.N
jo kisii ke kaam na aa sake mai.n vo ek musht-e-Gubaar huu.N

na to mai.n kisii kaa habiib huu.N na to mai.n kisii kaa raqiib huu.N
jo biga.D gayaa vo nasiib huu.N jo uja.D gayaa vo dayaar huu.N

meraa rang-ruup biga.D gayaa meraa yaar mujh se bichha.D gayaa
jo chaman fizaa.N me.n uja.D gayaa mai.n usii kii fasl-e-bahaar huu.N

paye faatehaa ko_ii aaye kyuu.N ko_ii chaar phuul cha.Daaye kyuu.N
ko_ii aake shammaa jalaaye kyuu.N mai.n vo bekasii kaa mazaar huu.N

mai.n nahii.n huu.N naGmaa-e-jaa.N_fishaa.N mujhe sun ke ko_ii karegaa kyaa
mai.n ba.De barog kii huu.N sadaa main ba.De dukh kii pukaar huu.N

lagataa nahii.n hai jii meraa uja.De dayaar me.n

lagataa nahii.n hai jii meraa uja.De dayaar me.n
kis kii banii hai aalam-e-naa_paayedaar me.n

kah do in hasarato.n se kahii.n aur jaa base.n
itanii jagah kahaa.N hai dil-e-daaG_daar me.n

umr-e-daraaz maa.Ng kar laaye the chaar din
do arazuu me.n kaT gaye do intazaar me.n

kitanaa hai bad_nasiib "Zafar" dafn ke liye
do gaz zamiin bhii na milii kuu-e-yaar me.n

khulataa nahii.n hai haal kisii par kahe baGair

khulataa nahii.n hai haal kisii par kahe baGair
par dil kii jaan lete hai.n dil_bar kahe baGair

mai.n kyuu.Nkar kahuu.N tum aao ki dil kii kashish se vo
aaye.Nge dau.De aap mere ghar kahe baGair

kyaa taab kyaa majaal hamaarii ki bosaa le.n
lab ko tumhaare lab se milaakar kahe baGair

[bosaa=kiss]

bedard tuu sune naa sune lek dard-e-dil
rahataa nahii.n hai aashiq-e-muztar kahe baGair

[lek=but (lekin); muzatar=anxious]

taqdiir ke sivaa nahii.n milataa kahii.n se bhii
dilavaataa ai "Zafar" hai muqaddar kahe baGair

ja kahiyo un se nasiim-e-sahar meraa chain gayaa merii niind ga_ii

ja kahiyo un se nasiim-e-sahar meraa chain gayaa merii niind ga_ii
tumhe.n merii na mujh ko tumhaarii Khabar meraa chain gayaa merii niind ga_ii

na haram me.n tumhaare yaar pataa na suraaG dair me.n hai milataa
kahaa.N jaa ke dekhuu.N mai.n jaa_uu.N kidhar meraa chain gayaa merii niind ga_ii

ai baadashaah-e-Khubaa.N-e-jahaa.N terii mohinii surat pe qurbaa.N
kii mai.n ne jo terii jabii.n pe nazar meraa chain gayaa merii niind ga_ii

huii bad-e-bahaarii chaman me.n ayaa.N gul buTii me.n baaqii rahii na fizaa
merii shaaKh-e-ummiid na laa_ii sa.Nvar meraa chain gayaa merii niind ga_ii

ai barq-e-tajalli bahar-e-Khudaa na jalaa mujhe hijr me.n shammaa saa
merii ziist hai misl-e-chiraaG-e-sahar meraa chain gayaa merii niind ga_ii

kahataa hai yahii ro ro ke "Zafar" merii aah-e-rasaa kaa huaa na asar
terii hijr me.n maut na aa_ii abhii meraa chain gayaa merii niind ga_ii

yahii kahanaa thaa shero ke aaj "Zafar" merii aah-e-rasaa me.n huaa na asar
tere hijr me.n maut na aaii magar meraa chain gayaa merii nii.nd gaii

hamane duniyaa me.n aake kyaa dekhaa

hamane duniyaa me.n aake kyaa dekhaa
dekhaa jo kuchh so Khvaab-saa dekhaa

hai to insaan Khaak kaa putalaa
lek paanii kaa bul-bulaa dekhaa

[lek (a short form of lekin)=but]

Khuub dekhaa jahaa.N ke Khuubaa.N ko
ek tujh saa na duusaraa dekhaa

[Khuubaa.N=beauties (beautiful ladies)]

ek dam par havaa na baa.Ndh habaab
dam ko dam bhar me.n yaa.N havaa dekhaa

[habaab=bubble]

na huye terii Khaak-e-paa ham ne
Khaak me.n aap ko milaa dekhaa

[Khaak-e-paa=dust of the feet (paao.n kii dhuul)]
[aap=self (in the context used here)]

ab na diije "Zafar" kisii ko dil
ki jise dekhaa bevafaa dekhaa

ham to chalate hai.n lo Khudaa haafiz

ham to chalate hai.n lo Khudaa haafiz
but_kadaa kaa buto.n Khudaa haafiz

kar chuke tum nasiihate.n ham ko
jaao bas naaseho Khudaa haafiz

aaj kuchh aur tarah par un kii
sunate hai.n guftaguu Khudaa haafiz

bar yahii hai hameshaa zaKhm pe zaKhm
dil kaa chaaraaGaro.n Khudaa haafiz

aaj hai kuchh ziyaadaa betaabii
dil-e-betaab ko Khudaa haafiz

kyo.n hifaazat ham aur kii Dhuu.Ndhe.n
har nafas jab ki hai Khudaa haafiz

chaahe ruKhsat ho raah-e-ishq me.n aql
ai "Zafar" jaane do Khudaa haafiz

dil kii merii beqaraarii mujh se kuchh puuchho nahii.n

dil kii merii beqaraarii mujh se kuchh puuchho nahii.n shab kii merii aah-o-zaarii mujh se kuchh puuchho nahii.n baar-e-Gam se mujh pe roz-e-hijr me.n ik ik gha.Dii kyaa kahuu.N hai kaisii bhaarii mujh se kuchh puuchho nahii.n merii suurat hii se bas maaluum kar lo ham-damo tum haqiiqat merii saarii mujh se kuchh puuchho nahii.n shaam se taa-subah jo bistar pe tum bin raat ko mai.n ne kii aKhtar-shumaarii mujh se kuchh puuchho nahii.n ai "Zafar" jo haal hai meraa karuu.Ngaa gar bayaa.N hogii un kii sharm-saarii mujh se kuchh puuchho nahii.n

biich me.n pardaa du_ii kaa thaa jo haayal uTh gayaa

biich me.n pardaa du_ii kaa thaa jo haayal uTh gayaa
aisaa kuchh dekhaa ke duniyaa se meraa dil uTh gayaa

shamaa ne ro ro ke kaaTii raat suulii par tamaam
shab ko jo mahafil se terii ai zeb-e-mahafil uTh gayaa

merii aa.Nkho.n me.n samaayaa us kaa aisaa nuur-e-haq
shauq-e-nazzaaraa ai badr-e-kaamil uTh gayaa

ai Zafar kyaa puuchhataa hai begunaah-o-bar-gunah
uTh gayaa ab jidhar ko vaaste qaatil uTh gayaa

baat karanii mujhe mushkil kabhii aisii to na thii

baat karanii mujhe mushkil kabhii aisii to na thii
jaisii ab hai terii mahafil kabhii aisii to na thii

le gayaa chhiin ke kaun aaj teraa sabr-o-qarar
beqaraarii tujhe ai dil kabhii aisii to na thii

chashm-e-qaatil merii dushman thii hameshaa lekin
jaise ab ho ga_ii qaatil kabhii aisii to na thii

un kii aa.Nkho.n ne Khudaa jaane kiyaa kyaa jaaduu
ke tabiiyat merii maa_il kabhii aisii to na thii

aks-e-ruKh-e-yaar ne kis se hai tujhe chamakaayaa
taab tujh me.n maah-e-kaamil kabhii aisii to na thii

kyaa sabab tuu jo biga.Dataa hai "Zafar" se har baar
Khuu terii huur-e-shamaa_il kabhii aisii to na thii

ye aur baat terii galii me.n na aaye.n ham

ye aur baat terii galii me.n na aaye.n ham
lekin ye kyaa ki shahar teraa chho.D jaaye.n ham

muddat hu_ii hai kuu-e-butaa.N kii taraf gaye
aavaaragii se dil ko kahaa.N tak bachaaye.n ham

[muddat = long time; kuu = lane; butaa.N = beloved]

shaayad ba_qaid-e-ziist ye saa_at na aa sake
tum daastaan-e-shauq suno aur sunaaye.n ham

[ba_qaid-e-ziist = within the prison of life (while alive)]
[saa_at = moment; daastaan = story/tale]

be_nuur ho chukii hai bahut shahar kii fazaa
taariik raasto.n me.n kahii.n kho na jaaye.n ham

[be_nuur = without light; taariik = dark]

us ke ba_Gair aaj bahut jii udaas hai
'Jalib' chalo kahii.n se use Dhuu.NDh laaye.n ham

is shahar-e-Kharaabii me.n Gam-e-ishq ke maare

is shahar-e-Kharaabii me.n Gam-e-ishq ke maare
zindaa hai.n yahii baat ba.Dii baat hai pyaare

ye ha.Nsataa huaa chaa.Nd ye pur_nuur sitaare
taabindaa-o-paa_indaa hai.n zarro.n ke sahaare

[taabindaa-o-paa_indaa = burning bright and eternally]

hasarat hai ko_ii Gunchaa hame.n pyaar se dekhe
aramaa.N hai ko_ii phuul hame.n dil se pukaare

har subah merii subah pe rotii rahii shabanam
har raat merii raat pe ha.Nsate rahe taare

kuchh aur bhii hai.n kaam hame.n ai Gam-e-jaanaa.N
kab tak ko_ii ulajhii hu_ii zulfo.n ko sa.Nvaare

dil kii baat labo.n par laakar ab tak ham dukh sahate hai.n

dil kii baat labo.n par laakar ab tak ham dukh sahate hai.n
ham ne sunaa thaa is bastii me.n dil vaale bhii rahate hai.n

biit gayaa saavan kaa mahiinaa mausam ne nazare.n badalii
lekin in pyaasii aa.Nkho.n me.n ab tak aa.Nsuu bahate hai.n

ek hame.n aavaaraa kahanaa ko_ii ba.Daa ilzaam nahii.n
duniyaa vaale dil vaalo.n ko aur bahut kuchh kahate hai.n

jis kii Khaatir shahar bhii chho.Daa jis ke liye bad_naam hue
aaj vahii ham se begaane begaane se rahate hai.n

vo jo abhii rah_guzar se chaak-e-garebaa.N guzaraa thaa
us aavaaraa diivaane ko 'Jalib'-'Jalib' kahate hai.n

aur sab bhuul gaye harf-e-sadaaqat likhanaa

aur sab bhuul gaye harf-e-sadaaqat likhanaa
rah gayaa kaam hamaaraa hii baGaavat likhanaa

laakh kahate rahe.n zulmat ko na zulmat likhanaa
ham ne siikhaa hii nahii.n pyaare baa_ijaazat likhanaa

na sile kii na sitaa_ish kii tamannaa ham ko
haq me.n logo.n ke hamaarii to hai aadat likhanaa

ham ne jo bhuul ke bhii shaah kaa qasiidaa na likhaa
shaayad aayaa isii Khuubii kii badaulat likhanaa

us se ba.Dh kar merii tahasiin bhalaa kyaa hogii
pa.Dh ke naaKhush hai.n meraa saahab-e-sarvat likhanaa

dahar ke Gam se huaa rabt to ham bhuul gaye
sarv qaamat kii javaanii ko qayaamat likhanaa

kuchh bhii kahate hai.n kahe.n shaah ke masaahib 'Jalib'
rang rakhanaa yahii apanaa isii suurat likhanaa

baat saaqii kii na Taalii jaayegii

baat saaqii kii na Taalii jaayegii
kar ke taubaa to.D Daali jaayegii

dekh lenaa vo na khaalii jaayegii
aah jo dil se nikaalii jaayegii

gar yahii tarz-e-fugaa.N hai a.ndalii
to bhii gulashan se nikaalii jaayegii

aate aate aayegaa un ko Khayaal
jaate jaate beKhayaali jaayegii

kyuu.N nahii.n milatii gale se teG-e-naaz
iid kyaa ab ke bhii khaalii jaayegii

our tarha se

main khush hun

ghazal kehna

Ghazal

main tujhey kahan dhundun

ho gaaa

aa jao

manzil na de

kuj shoq yaar fakiri da

koi baat karo

ye tajarubaa bhii karuu.N ye bhii kar dikhalaa_uu.N mai.n

ye tajarubaa bhii karuu.N ye bhii kar dikhalaa_uu.N mai.n
ki Khud ko yaad rakhuu.N us ko bhuul jaa_uu.N mai.n

[tajarubaa=experiment]

fareb-e-kaar me.n kuchh to hai ko_ii baat to hai
ki jaan buujh ke itane fareb khaa_uu.N mai.n

[fareb-e-kaar=one who betrays]

vo pal kahaa.N hai.n jo duniyaa se jo.Dataa thaa mujhe
jo paa_uu.N tujh ko to sab ke qariib aa_uu.N mai.n

kabhii to ho mere ehasaas-e-kam_tarii me.n kamii
kabhii to ho ki use khul ke aa_uu.N mai.n

vo shaKhs hai ki nasiim-e-sahar kaa jho.Nkaa hai
bikhar hii jaa_uu.N jo us ko gale lagaa_uu.N mai.n

[nasiim-e-sahar=morning wind]

azaa.N ke baad duaa ko jo haath uThaaye vo
'Imam' apanii namaaze.n bhii bhuul jaa_uu.N mai.n

[azaa.N=call for prayer]

tuu hai gar mujh se Khafaa Khud se Khafaa huu.N mai.n bhii

tuu hai gar mujh se Khafaa Khud se Khafaa huu.N mai.n bhii
mujh ko pahachaan ki terii hii adaa huu.N mai.n bhii

ek tujh se hii nahii.n fasl-e-tamannaa shaadaab
vahii mausam huu.N vahii aab-o-havaa huu.N mai.n bhii

sabt huu.N dast-e-Khaamoshii pe hinaa kii suurat
naashunidaa hii sahii teraa kahaa huu.N mai.n bhii

chaa.Nd ban kar tere aa.Ngan me.n utar hii jaa_uu.N
raat ke pichhale pahar maa.Ngii duaa huu.N mai.n bhii

yuu.N na murjhaa ki mujhe Khud pe bharosaa na rahe
pichhale mausam me.n tere saath khilaa huu.N mai.n bhii

jaane kis raah chaluu.N kaun se ruKh mu.D jaa_uu.N
mujh se mat mil ki zamaane kii havaa huu.N mai.n bhii

teraa hii bahr safiinaa ravaa.N bhii teraa hai

teraa hii bahr safiinaa ravaa.N bhii teraa hai
bha.Nvar bhii tere hai.n aur baad_baa.N bhii teraa hai

[bahr=ocean; safiinaa=boat; ravaa.N=moving]
[bha.Nvar=whirlpool; baad_baa.N=sail]

hai terii bazm me.n aaKhir kahaa.N jagah merii
charaaG bhii hai.n tere aur dhuaa.N bhii teraa hai

[bazm=gathering]

mujhe to nazr bhii karane ko kuchh nahii.n apanaa
jabii.n kii Khaak terii aastaa.N bhii teraa hai

[nazr=offering; jabii.n=firehead; Khaak=dust/ashes; aastaa.N=threshold]

naquush-e-paa ko uThaaye kahaa.N khaa.N jaa_uu.N
ki gard-e-rah bhii terii kaaravaa.N bhii teraa hai

[naquush-e-paa=footprints; gard=dust; rah=way; kaaravaa.N=caravan]

diyaa hai kyo.n mujhe lauh-o-qalam kaa baar-e-giraa.N
ki gardishe.n bhii terii aasmaa.N bhii teraa hai

lauh-o-qalam=slate and pen; baar=burden; giraa.N=heavy]
[gardish=revolution]

bas ek kashaakash-e-benaam aur mai.n bebas
natiijaa bhii hai teraa imtahaa.N bhii teraa hai

[kashaakash=struggle; benaam=without a name; bebas=helpless]
[natiijaa=result; imtahaa.N=test]

mai.n thak ke baiTh rahuu.N yaa qadam ba.Dhaaye chaluu.N
fanaa bhii terii hai naam-o-nishaa.N bhii teraa hai

[fanaa=mortality/destruction]

inkaar me.n iqaraar kii baat aa hii ga_ii hai

inkaar me.n iqaraar kii baat aa hii ga_ii hai
baato.n me.n Gam-e-yaar kii baat aa hii ga_ii hai

aayaa hai kabhii zikr agar daar-o-rasan kaa
gesuu-va-qad-e-yaar kii baat aa hii ga_ii hai

[daar-o-rasan=scaffolding and a hangman's noose]
[gesuu-va-qad-e-yaar=the height and hair of one's beloved]

jab surKhiI-e-gul_shan kaa kabhii zikr huaa hai
tere lab-o-ruKhsaar kii baat aa hii ga_ii hai

[surKhi-e-gulashan=(red) colour of the garden]
[lab-o-ruKhsaar=lips and cheeks]

Dhuu.NDaa hai agar zaKhm-e-tamannaa ne mudaavaa
ik nargis-e-biimaar kii baat aa hii ga_ii hai

[zaKhm-e-tamannaa=wound caused by desire; mudaavaa=cure]
[nargis-e-biimaar=beloved's eyes (not a direct translation)]

mil baiThe hai.n zindaa.N me.n agar shaam ko ahabaab
tere dar-o-diivaar kii baat aa hii ga_ii hai

[zindaa.N=prison; ahabaah=friends (plural of habiib)]
[dar=door; diivaar=walls]

chhe.Daa hai ko_ii talKh fasaanaa jo kisii ne
shiiriini-e-guftaar kii baat aa hii ga_ii hai

[talKh=bitter; fasaanaa=tale]
[shiiriini-e-guftaar=sweetness of (someone's) conversation]

dil akelaa hai bahut laalaa-e-saharaa kii tarah

dil akelaa hai bahut laalaa-e-saharaa kii tarah
tum ne bhii chho.D diyaa hai mujhe duniyaa kii tarah

[laalaa-e-saharaa=desert flower]

chho.D ke jaao na yuu.N ahad-e-guzishtaa kii tarah
ban ke ummiid raho vaadaa-e-fardaa kii tarah

[ahad-e-guzishtaa=bygone days; vaadaa-e-fardaa=promises of yesterday (past)]

tum havaa ho bikhero mujhe saahil saahil
mauj-e-mai ho to bahaa do mujhe dariyaa kii tarah

[saahil=shore; mauj=wave; mai=wine]

paas rahate ho to aataa hai judaa_ii kaa Khayaal
tum mere dil me.n ho andeshaa-e-fardaa kii tarah

[andeshaa-e-fardaa=remnants of the past]

biich me.n kuchh to rah-o-rasm-e-ta'alluq rakkho
ajanabii yuu.N nahii.n milate hai.n shanaasaa kii tarah

[rah-o-rasm-e-ta'alluq=social etiquettes/code/customs]
[shanaasaa=acquaintance]

mujhe tum nazar se giraa to rahe ho

mujhe tum nazar se giraa to rahe ho
mujhe tum kabhii bhii bhulaa naa sakoge
na jaane mujhe kyuu.N yaqii.n ho chalaa hai
merii yaad ko tum miTaa naa sakoge

merii yaad hogii jidhar jaaoge tum
kabhii naGmaa ban ke, kabhii ban ke aa.Nsuu
taD.apataa mujhe har taraf paaoge tum
shamaa jo jalaayii merii vafaa ne
bujhaanaa bhii chaaho bujhaa naa sakoge

kaabhii naam baato.n me.n aayaa jo meraa
to bechain ho hoke dil thaam loge
nigaaho.n pe chhaayegaa Gam kaa a.ndheraa
kisii ne jo puuchhaa sabab aa.Nsuo.n kaa
bataanaa bhii chaaho bataa naa sakoge

The following 'band' has been written by Kamraan Mehdi and is usually sung by Mehdi Hasan.

mere dil kii dha.Dakan banii hai jo sholaa
sulagate hai.n armaa.N yuu.N ban-ban ke aa.Nsuu
kabhii to tumhe.n bhii ye ehasaas hogaa
magar ham na ho.nge terii zindagii me.n
bulaanaa bhii chaaho bulaa naa sakoge

ham ko kisake Gam ne maaraa ye kahaanii phir sahii

ham ko kisake Gam ne maaraa ye kahaanii phir sahii
kisane to.Daa dil hamaaraa ye kahaanii phir sahii

dil ke luTane kaa sabab puuchho na sab ke saamane
naam aayegaa tumhaaraa ye kahaanii phir sahii

nafarato.n ke tiir khaa kar dosto.n ke shahar me.n
ham ne kis kis ko pukaaraa ye kahaanii phir sahii

kyaa bataaye.n pyaar kii baazii vafaa kii raah me.n
kaun jiitaa kaun haaraa ye kahaanii phir sahii

zabaan-e-hind hai urduu

zabaan-e-hind hai urduu to maathe kii shikan kyuu.N hai
vatan me.n be-vatan kyuu.N hai

[shikan = frown]


merii mazaluum urduu terii saa.Nso.n me.n ghuTan kyuu.N hai
teraa lahajaa mahakataa hai to lafzo.n me.n thakan kyuu.N hai
agar tuu phuul hai to phuul me.n itanii chubhan kyuu.N hai
vatan me.n be-vatan kyuu.N hai

[mazaluum = oppressed; ghuTan = suffocation]
[lahajaa = style/manner; thakan = fatigue]


ye naanak kii ye Khusro kii dayaa shankar kii bolii hai
ye diivaalii ye baisaakhii ye iid-ul-fitr holii hai
magar ye dil kii dha.Dakan aaj kal dil kii jalan kyuu.N hai
vatan me.n be-vatan kyuu.N hai


ye naazo.n se palii thii miir ke Gaalib ke aa.Ngan me.n
jo suuraj ban ke chamakii thii kabhii mahalo.n ke daaman me.n
vo shah-zaadii zabaano.n kii yahaa.N be-anjuman kyuu.N hai
vatan me.n be-vatan kyuu.N hai

[be-anjuman = without a gathering/assembly (alone)]


muhabbat kaa sabhii elaan kar jaate hai.n mahafil me.n
ke is ke vaaste jazbaa hai ham-dardii kaa har dil me.n
magar haq maa.Ngane ke vaqt ye begaanaapan kyuu.N hai
vatan me.n be-vatan kyuu.N hai

[elaan = proclaimation; jazbaa = feeling; ham-dardii = sympathy]
[begaanaapan = indifference/aloofness]


ye doshiizaa jo baazaaro.n se iThalaatii guzaratii thii
labo.n kii naazukii jis kii gulaabo.n sii bikharatii thii
jo tahaziibo.n kii sar kii o.Dhanii thii ab kafan kyuu.N hai
vatan me.n be-vatan kyuu.N hai

[doshiizaa = young girl; naazukii = delicacy; tahaziib = culture/etiquette]
[o.Dhanii = veil; kafan = shroud]


muhabbat kaa agar daavaa hai to is ko bachaao tum
jo vaadaa kal kiyaa thaa aaj vo vaadaa nibhaao tum
agar tum raam ho to phir ye raavan kaa chalan kyuu.N hai
vatan me.n be-vatan kyuu.N hai

sadaa detii hai Khushbuu chaa.Nd taare bol pa.Date hai.n

sadaa detii hai Khushbuu chaa.Nd taare bol pa.Date hai.n sadaa detii hai Khushbuu chaa.Nd taare bol pa.Date hai.n nazar jaisii nazar ho to nazaare bol pa.Date hai.n tumhaari hii nigaaho.n ne kahaa hai ham se ye aksar tumhaare jism par to rang saare bol pa.Date hai.n mahak jaate hai.n gul jaise sabaa ke chuum lene se agar lahare.n muKhaatib ho.n kinaare bol pa.Date hai.n zabaa.N se baat karane me.n jahaa.N rusvaa_ii hotii hai vahaa.N Khaamosh aa.Nkho.n ke ishaare bol pa.Date hai.n chhupaanaa chaahate hai.n un se dil ka haal ham lekin hamaare aa.Nsuo.n me.n gam hamaare bol pa.Date hai.n terii paabandiyo.n se ruk nahi.n sakatii.n ye fariyaade.n agar ham chup rahe.n to zaKhm saare bol pa.Date hai.n Contributed by Khursheed Ahmed

judaa_ii ho ke milan har adaa hamaarii hai

judaa_ii ho ke milan har adaa hamaarii hai
tumhaaraa shahar hai lekin fizaa hamaarii hai

shikaayate.n bhii kare.n ham to kis zabaan se kare.n
Khudaa banaayaa ham ne ye Khataa hamaarii hai

[Khataa = mistake]

hamaare jism kii uriyaanat pe mat ha.Nsanaa
ke tum jo o.Dhe hue ho vo ridaa hamaarii hai

[uriyaanat = nakedness/nudity; ridaa = cloak/sheet]

hamaare saamane zebaa nahii.n Guruur tumhe.n
jahaa.N pe baiThe ho tum vo jagaa hamaarii hai

[zebaa nahii.n = does not suit; Guruur = pride]
[jagaa = place(jagah)]

dil hai hiire kii kaanii jism gulaabo.n vaalaa

dil hai hiire kii kaanii jism gulaabo.n vaalaa
meraa mahabuub hai dar_asl kitaabo.n vaalaa

[kaanii = mine; dar_asl = in reality]

husn hai rang hai shoKhii hai adaa hai us me.n
ek hii jaam magar kitanii sharaabo.n vaalaa

[jaam = wine goblet]

yaar aa_iinaa huaa karate hai.n yaaro.n ke liye
teraa cheharaa to abhii tak hai naqaabo.n vaalaa

mujh se hogii nahii.n duniyaa ye tijaarat dil kii
mai.n karuu.N kyaa ke meraa zahan hai Khvaabo.n vaalaa

[tijaarat = trade/buying and selling; zahan = mind]

tuu rahegaa na tere zulm rahe.nge baaqii
din to aanaa hai kisii roz hisaabo.n vaalaa

husn-e-bebaak se ho jaatii hai.n aa.Nkhe.n roshan
dil me.n utaraa hai magar ruup hijaabo.n vaalaa

[bebaak = bold/outspoken; hijaab = bashfulness/shyness]

jo nazar aataa hai haasil nahii.n hotaa 'Manzar'
zindagaanii kaa safar bhii hai saraabo.n vaalaa

[saraab = mirage]

badalate vaqt kaa ik sil_silaa saa lagataa hai

badalate vaqt kaa ik sil_silaa saa lagataa hai
ke jab bhii dekho use duusaraa-saa lagataa hai

tumhaaraa husn kisii aadamii kaa husn nahii.n
kisii buzurg kii sachchii duaa saa lagataa hai

terii nigaah ko tamiiz rang-o-nuur kahaa.N
mujhe to Khuun bhii rang-e-hinaa saa lagataa hai

damaaG-o-dil ho.n agar mutma_ii.n to chhaao.n hai dhuup
thape.Daa luu kaa bhii ThanDii havaa saa lagataa hai

[mutma_ii.n = content/satisfied; luu = hot summer breeze]

vo chhat pe aa gayaa betaab ho ke aaKhir
Khudaa bhii aaj shariik-e-duaa saa lagataa hai

tumhaaraa haath jo aayaa hai haath me.n mere
ab aitabaar kaa mausam haraa-saa lagataa hai

nikal ke dekho kabhii nafarato.n ke pinjare se
tamaam shahar kaa "Manzar" khulaa saa lagataa hai

aap kii yaad aatii rahii raat bhar

aap kii yaad aatii rahii raat bhar
chashm-e-nam muskuraatii rahii raat bhar

raat bhar dard kii shammaa jalatii rahii
Gam kii lau tharatharaatii rahii raat bhar

baa.Nsurii kii surilii suhaanii sadaa
yaad ban ban ke aatii rahii raat bhar

yaad ke chaa.Nd dil me.n utarate rahe
chaa.Ndanii jagamaatii rahii raat bhar

koii diivaanaa galiyo.n me.n phirataa rahaa
koii aavaaz aatii rahii raat bhar

nigaah-e-saaqii-e-naamaharabaa.N ye kyaa jaane

nigaah-e-saaqii-e-naamaharabaa.N ye kyaa jaane
ki TuuT jaate hai.n Khud dil ke saath paimaane

milii jab unase nazar bas rahaa thaa ek jahaa.N
haTii nigaah to chaaro.n taraf the viiraane

hayaat laGzishe-paiham kaa naam hai saaqii
labo.n se jaam lagaa bhii sakuu.N Khudaa jaane

vo tak rahe the hamii.n ha.Ns ke pii gae aa.Nsuu
vo sun rahe the hamii.n kah sake na afasaane

ye aag aur nahii.n dil kii aag hai naadaa.N
chiraaG ho ke na ho jal bujhe.nge paravaane

fareb-e-saaqii-e-mahafil na puuchhiye "Majrooh"
sharaab ek hai badale hue hai.n paimaane

mujhe sahal ho ga_ii.n ma.nzile.N vo havaa ke ruKh bhii badal gae

mujhe sahal ho ga_ii.n ma.nzile.N vo havaa ke ruKh bhii badal gae
teraa haath haath me.n aa gayaa ke chiraaG raah me.n jal gae

vo lajaaye mere savaal par ke uThaa sake na jhukaa ke sar
u.Dii zulf chehare pe is tarah ke shabo.n ke raaz machal gae

vahii baat jo vo na kar sake mere sher-o-naGmaa me.n aa ga_ii
vahii lab na mai.n ji.nhe.n chhuu sakaa qadaah-e-sharaab me.n Dhal gae

unhe.n kab ke raas bhii aa chuke terii bazm-e-naaz ke haadase
ab uThe ke terii nazar phire jo gire the gir ke sa.nbhal gae

mere kaam aa ga_ii.n aaKhirash yahii kaavishe.n yahii garadishe.n
ba.Dahii.n is qadar merii ma.nzile.n ke qadam ke Khaar nikal gae

[aaKhirash=at last; kaavishe.n=attempts]

Khatm-e-shor-e-tuufaa.N thaa duur thii siyaahii bhii

Khatm-e-shor-e-tuufaa.N thaa duur thii siyaahii bhii
dam ke dam me.n afasaanaa thii merii tabaahii bhii

iltafaat samajhuu.N yaa beruKhii kahuu.N is ko
rah gaii Khalish ban kar usakii kamanigaahii bhii

yaad kar vo din jis din terii saKhtgiirii par
ashk bhar ke uThii thii merii begunaahii bhii

shama bhii ujaalaa bhii mai.n hii apanii mahafil kaa
mai.n hii apanii ma.nzil kaa raahabar bhii raahii bhii

gumbado.n se palaTii hai apanii hii sadaa "Majrooh"
masjido.n me.n kii jaake mai.n ne daadaKhvaahii bhii

ham ko junuu.N kyaa sikhalaate ho ham the pareshaa.N tumase ziyaadaa

ham ko junuu.N kyaa sikhalaate ho ham the pareshaa.N tumase ziyaadaa
chaak kiye hai.n hamane aziizo.n chaar garebaa.N tumase ziyaadaa

chaak-e-jigar muhataaj-e-rafuu hai aaj to daaman sirf lahuu hai
ek mausam thaa ham ko rahaa hai shauq-e-bahaaraa.N tumase ziyaadaa

jaao tum apanii baam kii Khaatir saarii lave.n shamo.n kii katar lo
zaKhmo.n ke mahar-o-maah salaamat jashn-e-chiraaGaa.N tumase ziyaadaa

ham bhii hameshaa qatl hue and tum ne bhii dekhaa duur se lekin
ye na samajhe hamako huaa hai jaan kaa nukasaa.N tumase ziyaadaa

za.njiir-o-diivaar hii dekhii tumane to "Majrooh" magar ham
kuuchaa-kuuchaa dekh rahe hai.n aalanm-e-zi.ndaa.N tumase ziyaadaa

ham hai.n mataa-e-kuuchaa-o-bazaar kii tarah

ham hai.n mataa-e-kuuchaa-o-baazaar kii tarah
uThatii hai har nigaah Khariidaar kii tarah

is kuu-e-tishnagii me.n bahut hai ke ek jaam
haath aa gayaa hai daulat-e-bedaar kii tarah

vo to hai.n kahii.n aur magar dil ke aas paas
phiratii hai koii shay nigaah-e-yaar kii tarah

siidhii hai raah-e-shauq pa yuu.N hii kabhii kabhii
Kham ho gaii hai gesuu-e-diladaar kii tarah

ab jaa ke kuch khulaa hunar-e-naakhuun-e-junuun
zaKhm-e-jigar hue lab-o-ruKhsaar kii tarah

'Majrooh' likh rahe hai.n vo ahal-e-vafaa kaa naam
ham bhii kha.De hue hai.n gunahagaar kii tarah

tumhe.n hai shauq agar bijaliyaa.N giraane kaa

 tumhe.n hai shauq agar bijaliyaa.N giraane kaa hamaaraa kaam bhii hai aashiyaa.N banaane kaa  bhalaa vo kaise samandar ke paar utaregaa nafas nafas jinhe.n Khadshaa hai Duub jaane kaa  sunaa hai aap hai.n maahir havaa chalaane me.n magar hame.n bhii hunar hai diye jalaane kaa

saaman-e-tijaarat meraa imaan nahii.n hai

 saaman-e-tijaarat meraa imaan nahii.n hai har dar pe jhuke sar ye merii shaan nahii.n hai  [tijaarat = trade]  har lafz ko siine me.n basaa lo to bane baat taako.n me.n sajaane ko ye quraan nahii.n hai  [taak = shelf]  allaah merii rizq kii barakat na chalii jaaye do roz se ghar me.n ko_ii mahamaan nahii.n hai  [rizq = subsistence/daily bread; barakat = abundance/good fortune]  ham ne to banaaye hai.n samandar me.n bhii raste yuu.N ham ko miTaana ko_ii aasaan nahii.n hai  jis ko buzurgo.n kii rivaayat na rahe yaad us shaKhs kii logo.n ko_ii pahachaan nahii.n hai  [buzurg = elder]

amn kaa jo paiGaam sunaane vaale hai.n

amn kaa jo paiGaam sunaane vaale hai.n galiyo.n galiyo.n aag lagaane vaale hai.n  tum le jaao nezaa Khanjar aur talvaar ham maqtal me.n sar le jaane vaale hai.n   zulm ke kaale baadal se Daranaa kaisaa ye mausam to aane jaane vaale hai.n  biimaaro.n kaa ab to Khudaa hii haafiz hai saare masiihaa zahar pilaane vaale hai.n  ** This was a satire on the state on medical  schools and the attitude of doctors in India  these days **  jaan bachaane vaale to sab hai.n lekin ab kitane imaan bachaane vaale hai.n  ham ko un valiyo.n kii nisbat haasil hai dasht ko jo gul_zaar banaane vaale hai.n  bhuukaa rah ke saa_il ko Khairaat jo de ham bhii 'Majid' usii gharaane vaale hai.n  [saa_il = beggar]

din kaT rahe hai.n kash-ma-kash-e-rozagaar me.n

din kaT rahe hai.n kash-ma-kash-e-rozagaar me.n
dam ghuT rahaa hai saayaa-e-abr-e-bahaar me.n

aatii hai apane jism ke jalane kii buu mujhe
luTate hai.n nakahato.n ke sabuu jab bahaar me.n

[nakahat=fragrance]

guzaraa idhar se jab ko_ii jho.nkaa to chau.nk kar
dil ne kahaa ye aa gaye ham kis dayaar me.n

mai.n ik pal se ra.nj-e-furaavaa.N me.n kho gayaa
murjhaa gaye zamaane mere i.ntazaar me.n

[ra.nj-e-furaavaa.N=extreme sadness]

hai ku.nj-e-aafiyat tujhe paa kar pataa chalaa
kyaa hum-hume the gard-e-sar-e-rahaguzaar me.n

[ku.nj-e-aafiyat=place for rest]

taskiin-e-dil-e-mahazuu na huii vo sa_ii-e-qaram faramaa bhii gaye

taskiin-e-dil-e-mahazuu na huii vo sa_ii-e-qaram faramaa bhii gaye
us sa_ii-e-qaram kaa kyaa kahiye bahalaa bhii gaye ta.Dapaa bhii gaye

ek arz-e-vafaa bhii kar na sake kuchh kah na sake kuchh sun na sake
yahaa.N ham ne zabaa.N hii khole thii vahaa.N aa.Nkh jhukii sharamaa bhii gaye

aashuftagii-e-vahashat kii qasam hairat kii qasam hasarat kii qasam
ab aap kahe kuchhh yaa na kahe ham raaz-e-tabassum paa bhii gaye

ruudaad-e-Gam-e-ulfat un se ham kyaa kahate kyo.nkar kahate
ek harf na nikalaa hoTho.n se aur aa.Nkh me.n aa.Nsuu aa bhii gaye

arbaab-e-junuu.N pe furkat me.n ab kyaa kahiye kyaa kyaa guzaraa
aaye the savaad-e-ulfat me.n kuchhh kho bhii gaye kuchhh paa bhii gaye

ye rang-e-bahaar-e-aalam hai kyaa fiqr hai tujh ko ai saaqii
mahafil to terii sunii na huii kuchhh uTh bhii gaye kuchhh aa bhii gaye

is mahafil-e-kaif-o-mastii me.n is anjuman-e-irafaanii me.n
sab jaam-ba-kaf baiThe rahe ham pii bhii gaye chhhalakaa bhii gaye

ta'arruf

Khuub pahachaan lo asrar huu.N mai.n
jins-e-ulfat kaa talab_gaar huu.N mai.n

ishq hii ishq hai duniyaa merii
fitanaa-e-aql se bezaar huu.N mai.n

chhe.Datii hai jise mizaraab-e-alam
saaz-e-fitarat kaa vahii taar huu.N mai.n

aib jo haafiz-o-Khayyaam me.n thaa
haa.N kuchh is kaa bhii gunah_gaar huu.N mai.n

zindagii kyaa hai gunaah-e-aadam
zindagii hai to gunah_gaar huu.N mai.n

merii baato.n me.n masiihaa_ii hai
log kahate hai.n ki biimaar huu.N mai.n

ek lapakataa huaa sholaa huu.N mai.n
ek chalatii hu_ii talavaar huu.N mai.n

siine me.n un ke jalve chhupaaye huye to hai.n

siine me.n un ke jalve chhupaaye huye to hai.n
ham apane dil ko tuur banaaye huye to hai.n

[tuur=the mountain on which Moses had his vision]

taasiir-e-jazb-e-shauq dikhaaye huye to hai.n
ham teraa har hijaab uThaaye huye to hai.n

[taasiir=effect/result; jazbaa=emotion; hijaab=veil]

haa.N vo kyaa huaa vo hausalaa-e-diid ahal-e-dil
dekho na vo naqaab uThaaye huye to hai.n

[hausalaa-e-diid=courage to see/view]

tere gunaaha_aar gunaah_gaar hii sahii
tere karam kii aas lagaaye huye to hai.n

allaah re qaamayaabii-e-aavaaragaan-e-ishq
Khud gum huye to kyaa use paaye huye to hai.n

ye tujh ko iKhtiyaar hai taasiir de na de
dast-e-duaa ham aaj uThaaye huye to hai.n

[iKhtiyaar=control; taasiir=result; dast-e-duaa=hands raised in prayer]

miTate huo.n ko dekh ke kyo.n ro na de.n 'Majaz'
aaKhir kisii ke ham bhii miTaaye huye to hai.n

saaraa aalam gosh bar aavaaz hai

saaraa aalam gosh bar aavaaz hai
aaj kin haatho.n me.n dil kaa saaz hai

haa.N zaraa jurrat dikhaa ai jazb-e-dil
husn ko parde pe apane naaz hai

kam_nashii.n dil kii haqiiqat kyaa kahuu.N
soz me.n Dubaa hu_aa ik saaz hai

aap kii maKhmuur aa.Nkho.n kii qasam
merii maiKhvaarii abhii tak raaz hai

ha.Ns diye vo mere rone par magar
un ke ha.Ns dene me.n bhii ek raaz hai

chhup gaye vo saaz-e-hastii chhe.D kar
ab to bas aavaaz hii aavaaz hai

husn ko naahaq pashemaa.N kar diyaa
ai junuu.N ye bhii ko_ii andaaaz hai

saarii mahafil jis pe jhuum uTThii 'Majaz'
vo to aavaaz-e-shikast-e-saaz hai

rah-e-shauq se ab haTaa chaahataa huu.N

rah-e-shauq se ab haTaa chaahataa huu.N
koshish husn kii dekhanaa chaahataa huu.N

ko_ii dil-saa dard aashanaa chaahataa huu.N
rah-e-ishq me.n rah_numaa chaahataa huu.N

tujhii se tujhe chhiinanaa chaahataa huu.N
ye kyaa chaahataa huu.N ye kyaa chaahataa huu.N

Khataao.n pe jo mujh ko maa_il kare phir
sazaa aur aisii sazaa chaahataa huu.N

vo maKhmuur nazare.n vo mad_hosh aa.Nkhe.n
Kharaab-e-muhabbat huaa chaahataa huu.N

vo aa.Nkhe.n jhukii.n vo ko_ii muskuraayaa
payaam-e-muhabbat sunaa chaahataa huu.N

tujhe dhuu.NDhataa huu.N terii justajuu hai
mazaa hai Khud gum huaa chaahataa huu.N

kahaa.N kaa karam aur kaisii inaayat
'Majaz' ab jafaa hii jafaa chaahataa huu.N

raat aur rel

phir chalii hai rel isTeshan se laharaatii hu_ii
niim-shab kii Khaamoshii me.n zer-e-lab gaatii hu_ii

[isTeshan=station; niim-shab=midnight; zer-e-lab=humming]

Dag-magaatii, jhuumatii, siiTii bajaatii, khelatii
vaadii-o-kohasar kii Tha.nDii havaa khaatii hu_ii

[vaadii-o-kohasar=valley and mountains]

tez jho.nko.n me.n vo chham chham kaa sarod-e-dil-nashii.n
aa.Ndhiyo.n me.n meh barasane kii sadaa aatii hu_ii

[meh=rain]

jaise maujo.n kaa tarannum jaise jal-pariyo.n ke giit
ik-ik lay me.n hazaaro.n zam-zame.n gaatii hu_ii

naunihaalo.n ko sunaatii miThii miThii loriyaa.N
naaz-niino.n ko sunahare Khvaab dikhalaatii hu_ii

Thokare.n khaakar, lachakatii, gunagunaatii, jhumatii
sar-Khushii me.n ghu.ngharuuo.n kii taal par gaatii hu_ii

naaz se har mo.D par khaatii hu_ii sau pech-o-Kham
ik dulhan apanii adaa se aap sharmaatii hu_ii

[pech-o-Kham=twists and turns]

raat kii taariikiyo.n me.n jhil-milaatii, kaa.Npatii
paTariyo.n pe duur tak siimaab chhalakaatii hu_ii

[taariikii=darkness; siimaab=mercury]

jaise aadhii raat ko nikalii ho ik shaahii baraat
shaadiyaano.n kii sadaa se vazd me.n aatii hu_ii

[shaadiyaano.n=musical instruments; vazd=extreme happiness]

mu.ntashir kar ke fazaa me.n jaa-ba-jaa chi.ngaariyaa.N
daaman-e-mauj-e-havaa me.n phuul barasaatii hu_ii

[mu.ntashir=in disarray]

tez-tar hotii hu_ii ma.nzil-ba-ma.nzil dam-ba-dam
raftaa raftaa apanaa asalii ruup dikhalatii hu_ii

siinaa-e-kohasar par cha.Dhatii hu_ii be-iKhtiyaar
ek naagan jis tarah mastii me.n laharaatii hu_ii

[kohasar=mountain; be-iKhtiyaar=without control]
[naagan(naagin)=snake]

ik sitaaraa TuuT kar jaise ravaa.N ho arsh par
rifat-e-kohasar se maidaan me.n aatii hu_ii

[rifat-e-kohasar=mountain peak]

ik baguule kii tarah ba.Dhatii hu_ii maidaan me.n
ja.ngalo.n me.n aa.Ndhiyo.n kaa zor dikhalaatii hu_ii

yaad aa jaaye puuraane devataao.n kaa jalaal
in qayaamat-Kheziyo.n ke saath balakhaatii hu_ii

[jalaal=brilliance]

ek raKhsh-e-be-inaa.N kii barq-raftaarii ke saath
Kha.ndaqo.n ko phaa.Ndatii Tiilo.n se kataraatii hu_ii

[raKhsh-e-be-inaa.N=a horse without reins]
[Kha.ndaqo.n=chasms]

murG-zaaro.n me.n dikhaatii juu-e-shirii.n kaa Khiraam
vaadiyo.n me.n abr ke maani.nd ma.Dalaatii hu_ii

[murG-zaaro.n=green jungles; juu-e-shiirii.n=sweet water river]
[Khiraam=slow pace; abr=cloud; maani.nd=like]

ik pahaa.Dii par dikhaatii aabashaaro.n kii jhalak
ik biyaabaa.N me.n chiraaG-e-tuur dikhalaatii hu_ii

justajuu me.n ma.nzil-e-maqasuud kii diivaanaavaar
apanaa sar dhunatii fazaa me.n baal bikharaatii hu_ii

chhe.Datii ik vazd ke aalam me.n saaz-e-saramadii
Gaiz ke aalam me.n muu.Nh se aag barasaatii hu_ii

[saaz-e-saramadii=immortal music; Gaiz=anger]

re.ngatii, mu.Datii, machalatii, til-milaatii, haa.Npatii
apane dil kii aatish-e-pinhaa.N ko bha.Dakaatii hu_ii

[aatish-e-pinhaa.N=hidden fire]

Khud-ba-Khud ruuThii hu_ii, bifarii hu_ii, bikharii hu_ii
shor-e-paiham se dil-e-getii ko dha.Dakaatii hu_ii

shor-e-paiham=continuous noise; dil-e-getii=world's heart]

pul pe dariyaa ke damaadam kau.Ndatii lalakaaratii
apanii is tuufaan-a.ngezii pe itaraatii hu_ii

pesh karatii biich nadii me.n chiraaGaa.N kaa samaa.N
saahilo.n pe ret ke zarro.n ko chamakaatii hu_ii

muu.Nh me.n ghusatii hai surango.n ke yakaayak dau.D kar
dan-danaatii, chiiKhatii, chi.nghaa.Datii gaatii hu_ii

aage aage justajuu-aamez nazare.n Daalatii
shab ke haibatanaak nazzaaro.n se ghabaraatii hu_ii

[justajuu-aamez=inquisitive; haibatanaak=terrifying]

ek mujarim kii tarah sahamii hu_ii simaTii hu_ii
ek mufalis kii tarah sardii me.n tharraatii hu_ii

[mufalis=poor]

tezii-e-raftaar ke sikke jamaatii jaa-ba-jaa
dasht-o-dar me.n zindagii kii lahar dau.Daatii hu_ii

[dasht-o-dar=deserted and populated areas]

safaah-e-dil se miTaatii ahad-e-maazii ke nuquush
haal-o-mustaqabil ke dil-kash Khvaab dikhalaatii hu_ii

[safaah-e-dil=paper of the heart; ahad-e-maazii=past]
[nuquush=picture/mark; haal-o-mustaqabil=present and future]

Daalatii behis chaTTaano.n par hiqaarat kii nazar
koh par ha.Nsatii falak ko aa.Nkh dikhalatii hu_ii

[falak=sky]

daaman-e-taariikii-e-shab kii u.Daatii dhajjiyaa.N
qasr-e-zulmat par musal-sal tiir barasaatii hu_ii

[qasr-e-zulmat=palace of darkness]

zad me.n ko_ii chiiz aa jaaye to us ko piis kar
irtiqaa-e-zindagii ke raaz batalaatii hu_ii

[irtiqaa-e-zindagii=progress of life]

zom me.n peshaanii-e-seharaa pe Thokar maaratii
phir subak-raftaariyo.n ke naaz dikhalaatii hu_ii

[zom=pride; subak-raftaariyo.n=slow pace]

ek sarkarsh fauj kii suurat alam khole hue
ek tuufaanii garaj ke saath darraatii hu_ii

[alam=flag]

har qadam par top kii sii ghan-garaj ke saath saath
goliyo.n kii san-saanaahaT kii sadaa aatii hu_ii

vo havaa me.n saika.Do.n ja.ngii duhal bajate hue
vo bigul kii jaa.N-fazaa aavaaz laharaatii hu_ii

[ja.ngii duhal=war drum]

al-Garaz u.Datii chalii jaatii hai beKhauf-o-Khatar
shaayar-e-aatish-nafas kaa Khuun khaulaatii hu_ii

[al-Garaz=meaning that]

kuchh tujh ko Khabar hai ham kyaa kyaa ai shorish-e-dauraa.N bhuul gaye

kuchh tujh ko Khabar hai ham kyaa kyaa ai shorish-e-dauraa.N bhuul gaye
vo zulf-e-pareshaa.N bhuul gaye vo diidaa-e-giriiyaa bhuul gaye

ai shauq-e-nazaaraa kyaa kahiye nazaro.n me.n ko_ii suurat hii nahii.n
ai zauq-e-tasavvur kyaa kahiye ham suurat-e-jaanaa.N bhuul gaye

ab gul se nazar milatii hii nahii.n ab dil kii kalii khilatii hii nahii.n
ai fasl-e-bahaaraa.N ruKhasat ho ham lutf-e-bahaaraa.N bhuul gaye

sab ko to madaavaa kar Daalaa apanaa hii madaavaa kar na sake
sab ke girebaa.N sii Daale apanaa hii girebaa.N bhuul gaye

ye apanii vafaa kaa aalaam hai ab un kii jafaa ko kyaa kahiye
ek nashtar-e-zahar-e-aagaahii rakh kar nazdiik-e-rag-e-jaa.N bhuul gaye

Khud dil me.n rah ke aa.Nkh se pardaa kare ko_ii

Khud dil me.n rah ke aa.Nkh se pardaa kare ko_ii
haa.N lutf jab hai paake bhii Dhuu.NDhaa kare ko_ii

tum ne to hukm-e-tark-e-tamannaa sunaa diyaa
kis dil se aah tark-e-tamannaa kare ko_ii

duniyaa laraz ga_ii dil-e-hiramaa.N_nasiib kii
is tarah saaz-e-aish na chhe.Daa kare ko_ii

[hiramaa.N_nasiib=nasiib ke maare hue]

mujh ko ye aarazuu vo uThaaye.n naqaab Khud
un ko ye intazaar taqaazaa kare ko_ii

rangiinii-e-naqaab me.n Gum ho ga_ii nazar
kyaa be-hijaabiyo.n kaa taqaazaa kare ko_ii

yaa to kisii ko jurrat-e-diidaar hii na ho
yaa phir merii nigaah se dekhaa kare ko_ii

hotii hai is me.n husn kii tauhiin ai 'Majaz'
itanaa na ahal-e-ishq ko rusavaa kare ko_ii

kamaal-e-ishq hai diivaanaa ho gayaa huu.N mai.n

kamaal-e-ishq hai diivaanaa ho gayaa huu.N mai.n
ye kis ke haath se daaman chhu.Daa rahaa huu.N mai.n

[kamaal-e-ishq=limits of love]

tumhii.n to ho jise kahatii hai naaKhudaa duniyaa
bachaa sako to bachaa lo ki Duubataa huu.N mai.n

[naaKhudaa=boatsman]

ye mere ishq kii majabuuriyaa.N ma'az-allaah
tumhaaraa raaz tumhii.n se chhupaa rahaa huu.N mai.n

[ma'az-allah=In the protection of God/at the mercy of God]

is ik hijaab pe sau be-hijaabiyaa.N sadaqe
jahaa.N se chaahataa huu.N tumko dekhataa huu.N mai.n

[hijaab=veil]

bataane vaale vahii.n par bataate hai.n ma.nzil
hazaar baar jahaa.N se guzar chukaa huu.N mai.n

kabhii ye zom ki tuu mujh se chhup nahii.n sakataa
kabhii ye vaham ki Khud bhii chhupaa huaa huu.N mai.n

[zom=conviction/belief]

mujhe sune na ko_ii mast-e-baadaa-e-isharat
'Majaz' TuuTe huye dil kii ik sadaa huu.N mai.n

[mast-e-baadaa-e-isharat= drunk on the wine of 'isharat' (happiness)]

junuun-e-shauq ab bhii kam nahii.n hai

junuun-e-shauq ab bhii kam nahii.n hai
magar vo aaj bhii barham nahii.n hai

bahut mushkil hai duniyaa kaa sa.Nvaranaa
terii zulfo.n ke pech-o-Kham nahii.n hai

bahut kuchh aur bhii hai jahaa.N me.n
ye duniyaa mahaz Gam hii Gam nahii.n hai

merii barbaadiyo.n ke ham_nashino.n
tumhe.n kyaa Khud mujhe bhii Gam nahii.n hai

abhii bazm-e-tarab se kyaa uThuu.N mai.n
abhii to aa.Nkh bhii pur_nam nahii.n hai

'Majaz' ek baadaakash to hai yaqiinan
jo ham sunate the vo aalam nahii.n hai

izn-e-Khiraam lete huye aasamaa.N se ham

izn-e-Khiraam lete huye aasamaa.N se ham
haTakar chale hai.n rahaguzar-e-kaaravaa.N se ham

kyo.nkar huaa hai faash zamaane pe kyaa kahe.n
vo raaz-e-dil jo kah na sake raazadaa.N se ham

ham_dam yahii hai rahaguzar-e-yaar-e-Khush_Khiraam
guzare hai.n laakh baar isii kahakashaa.N se ham

kyaa kyaa huaa hai ham se junuu.N me.n na puuchhiye
ulajhe kabhii zamii.n se kabhii aasamaa.N se ham

Thukaraa diye hai.n aql-o-Khiraad ke sanam_kade
ghabaraa chuke hai.n kashamakash-e-imtehaa.N se ham

baKhshii hai.n ham ko ishq ne vo jurrate.n 'Majaz'
Darate nahii.n siyaasat-e-ahal-e-jahaa.N se ham

husn phir fitnaagaar hai kyaa kahiye

husn phir fitnaagaar hai kyaa kahiye
dil kii jaanib nazar hai kyaa kahiye

phir vahii rahaguzar hai kyaa kahiye
zindagii raahabar hai kyaa kahiye

husn Khud pardaadaar hai kyaa kahiye
ye hamaarii nazar hai kyaa kahiye

aah to be-asar thii baraso.n se
naGmaa bhii be-asar hai kyaa kahiye

husn hai ab na husn ke jalve
ab nazar hii nazar hai kyaa kahiye

aaj bhii hai 'Majaz' Khaak_nashii.n
aur nazar arsh par hai kyaa kahiye

mujy sundal kr do

mere dil mere musafir

husn ko be-hijaab honaa thaa

husn ko be-hijaab honaa thaa
shauq ko kaamayaab honaa thaa

hijr me.n kaif-e-iztaraab na puuchh
Khuun-e-dil bhii sharaab honaa thaa

tere jalvo.n me.n ghir gayaa aaKhir
zarre ko aafataab honaa thaa

kuchh tumhaarii nigaah kaafir thii
kuchh mujhe bhii Kharaab honaa thaa

raat taaro.n kaa TuuTanaa bhii 'Majaz'
baa_is-e-iztaraab honaa thaa

dil-e-Khuu.N_gashtaa-e-jafaa pe kahii.n

dil-e-Khuu.N_gashtaa-e-jafaa pe kahii.n
ab karam bhii giraa.N na ho jaaye

tere biimaar kaa Khudaa haafiz
nazr-e-chaaraagaraa.N na ho jaaye

ishq kyaa kyaa n aafate.n Dhaaye
husn gar mahar_baa.N na ho jaaye

mai ke aage Gamo.n kaa koh-e-giraa.N
ek pal me.n dhuaa.N na ho jaaye

phir 'Majaz' in dino.n ye Khataraa hai
dil halaak-e-butaa.N na ho jaaye

usy kehna

barbaad tamannaa pe ataab aur zyaadaa

barbaad tamannaa pe ataab aur zyaadaa
haa.N merii mohabbat kaa javaab aur zyaadaa

roye na abhii ahal-e-nazar haal pe mere
honaa hai abhii mujh ko Kharaab aur zyaadaa

aavaaraa-va-majanuu.N hii pe maukuuf nahii.n kuchh
milane hai.n abhii mujh ko Khitaab aur zyaadaa

uThe.nge abhii aur bhii tuufaa.N mere dil se
dekhuu.Ngaa abhii ishq ke Khvaab aur zyaadaa

Tapakegaa lahuu aur mere diidaa-e-tar se
dha.Dakegaa dil-e-Khaanaa_Kharaab aur zyaadaa

ai mutrib-e-bebaak ko_ii aur bhii naGmaa
ai saaqii-e-fayyaaz sharaab aur zyaadaa

aavaaraa

shahar kii raat aur mai.n naashaad-o-naakaaraa phiruu.N
jag_magaatii jaagatii sa.Dako.n pe aavaaraa phiruu.N
Gair kii bastii hai kab tak dar badar maraa phiruu.N

ai Gam-e-dil kyaa karuu.N ai vahashat-e-dil kyaa karuu.N

jhil_milate qum_qumo.n kii raah me.n zanjiir sii
raat ke haatho.n me.n din kii mohanii tasviir sii
mere siine par magar chalatii hu_ii shamashiir sii

ai Gam-e-dil kyaa karuu.N ai vahashat-e-dil kyaa karuu.N

ye rupahalii chhaao.N ye aakaash par taaro.n kaa jaal
jaise suufii kaa tasavvur jaise aashiq kaa Khayaal
aah lekin kaun jaane kaun samajhe jii kaa haal

ai Gam-e-dil kyaa karuu.N ai vahashat-e-dil kyaa karuu.N

phir vo TuuTaa ik sitaaraa phir vo chhuuTii phul_jha.Dii
jaane kis kii god me.n aaye ye motii kii la.Dii
huuk sii siine me.n uThii choT sii dil par pa.Dii

ai Gam-e-dil kyaa karuu.N ai vahashat-e-dil kyaa karuu.N

raat ha.Ns ha.Ns kar ye kahatii hai ke maiKhaane me.n chal
phir kisii shah_naaz-e-laalaaruKh ke kaashaane me.n chal
ye nahii.n mumkin to phir ai dost viiraane me.n chal

ai Gam-e-dil kyaa karuu.N ai vahashat-e-dil kyaa karuu.N

har taraf bikharii hu_ii rangiiniyaa.N raanaa_iiyaa.N
har qadam par isharate.n letii huii anga.Daiiyaa.N
ba.Dh rahii hai god phailaaye hue rusavaa_iiyaa.N

ai Gam-e-dil kyaa karuu.N ai vahashat-e-dil kyaa karuu.N

raaste me.n ruk ke dam le luu.N merii aadat nahii.n
lauT kar vaapas chalaa jaa_uu.N merii fitarat nahii.n
aur ko_ii ham_navaa mil jaaye ye qismat nahii.n

ai Gam-e-dil kyaa karuu.N ai vahashat-e-dil kyaa karuu.N

muntazir hai ek tuufaan-e-balaa mere liye
ab bhii jaane kitane daravaaze hai.n vaa mere liye
par musibat hai meraa ahad-e-vafaa mere liye

ai Gam-e-dil kyaa karuu.N ai vahashat-e-dil kyaa karuu.N

jii me.n aataa hai ki ab ahad-e-vafaa bhii to.D duu.N
un ko paa sakataa huu.N mai.n ye aasaraa bhii chho.D duu.N
haa.N munaasib hai ye zanjiir-e-havaa bhi to.D duu.N

ai Gam-e-dil kyaa karuu.N ai vahashat-e-dil kyaa karuu.N

ik mahal kii aa.D se nikalaa vo piilaa maah_taab
jaise mullaah kaa amaamaa jaise baniye kii kitaab
jaise muflis kii javaanii jaise bevaa kaa shabaab

ai Gam-e-dil kyaa karuu.N ai vahashat-e-dil kyaa karuu.N

dil me ek sholaa bha.Dak uThaa hai aaKhir kyaa karuu.N
meraa paimaanaa chhalak uThaa hai aaKhir kyaa karuu.N
zaKhm siine kaa mahak uThaa hai aaKhir kyaa karuu.N

ai Gam-e-dil kyaa karuu.N ai vahashat-e-dil kyaa karuu.N

muflisii aur ye mazaahir hai.n nazar ke saamane
saika.Do.n changez-o-naadir hai.n nazar ke saamane
saika.Do.n sultaan jaabar hai.n nazar ke saamane

ai Gam-e-dil kyaa karuu.N ai vahashat-e-dil kyaa karuu.N

le ke ik changez ke haatho.n se Khanjar to.D duu.N
taaj par us ke damakataa hai jo patthar to.D duu.N
ko_ii to.De yaa na to.De mai.n hii ba.Dhakar to.D duu.N

ai Gam-e-dil kyaa karuu.N ai vahashat-e-dil kyaa karuu.N

ba.Dh ke is indar-sabhaa kaa saaz-o-saamaa.N phuu.Nk duu.N
is kaa gul_shan phuu.Nk duu.N us kaa shabistaa.N phuu.Nk duu.N
taKht-e-sultaa.N kyaa mai.n saaraa qasr-e-sultaa.N phuu.Nk duu.N

ai Gam-e-dil kyaa karuu.N ai vahashat-e-dil kyaa karuu.N

jii me.n aataa hai ye murdaa chaa.Nd-taare noch luu.N
is kinaare noch luu.N aur us kinaare noch luu.N
ek do kaa zikr kyaa saare ke saare noch luu.N

ai Gam-e-dil kyaa karuu.N ai vahashat-e-dil kyaa karuu.N

tumhary yad ate hai

mujy koy rang dia hota

saare badan ka Khuun pasiine me.n jal gayaa

saare badan ka Khuun pasiine me.n jal gayaa
itanaa chale ke jism hamaaraa pighal gayaa

chalathe ki gin rahe the musiibaat ke raat din a
dam lene ham jo baiTh gaye dam nikal gayaa

achchhaa huaa jo raah me.n Thokar lagii hame.n
ham gor pa.De to saaraa zamaanaa sambhal gayaa

vahashat me.n ko_ii saath hamaaraa na de sakaa
daaman kii fikr kii to garebaa.N nikal gayaa

yuu.N dostii ke naam ko rusavaa na kiijiye

yuu.N dostii ke naam ko rusavaa na kiijiye
tark-e-ta'alluqaat kaa charchaa na kiijiye

jurm-o-sitam kaa paas bhii ulfat me.n shart hai
palako.n ko aa.Nsuuo.n se bhigoyaa na kiijiye

aisaa na ho ummiid se rishtaa hii TuuT jaaye
har roz mujhase vaadaa-e-fardaa na kiijiye

hamdard jis ko apanaa samajhate rahe hai.n aap
us kaa hii zindagii me.n bharosaa na kiijiye

"Mahir" vafuur-e-Gam se na ghabaraa_iye kabhii
Khuddaarii-e-hayaat ko rusavaa na kiijiye

hazaar Gam the merii zindagii akelii thii

hazaar Gam the merii zindagii akelii thii
Khushii jahaa.N kii mere vaaste pahelii thii

[pahelii=riddle]

vo aaj bach ke nikalate hai.n mere saaye se
ki mai.n ne jin ke liye Gam kii dhuup jhelii thii

judaa hu_ii na kabhii mujh se gardish-e-dauraa.N
merii hayaat kii bachapan se ye sahelii thii

[gardish-e-dauraa.N=wheel of time; hayaat=life]

cha.Dhaa rahe hai.n vo hii aaj aastii.n mujh par
ki jin kii piiTh pe kal tak merii hathelii thii

[aastii.n=sleeve]

ab un kii qabr pe jalataa nahii.n diyaa ko_ii
ki jin kii dahar me.n roshan bahut havelii thii

[qabr=grave; dahar=world]

vo jhuk ke phir merii turbat pe kar rahe hai.n salaam
isii adaa ne to "Mahir" kii jaan le lii thii

[turbat=grave]

aaye hai.n samajhaane log

aaye hai.n samajhaane log
hai.n kitane diivaane log

dair-o-haram me.n chain jo milataa
kyo.n jaate maiKhaane log

jaan ke sab kuchh, kuchh bhii na jaane
hai.n kitane a.njaane log

vaqt pe kam nahii.n aate hai.n
ye jaane pahachaane log

ab jab mujh ko hosh nahii.n hai
aaye hai.n samajhaane log

miTTii kii imaarat saayaa dekar miTTii me.n ham_vaar hu_ii viiraanii se ab kaam hai aur viiraanii kis kii yaar hu_ii Dar-Dar ke qadam yuu.N rakhataa

miTTii kii imaarat saayaa dekar miTTii me.n ham_vaar hu_ii
viiraanii se ab kaam hai aur viiraanii kis kii yaar hu_ii

Dar-Dar ke qadam yuu.N rakhataa huu.N Khvaabo.n ke saharaa me.n
ye reg abhii zanjiir banii ye chaa.Nv abhii diivaar hu_ii

har pattii bojhil ho ke girii sab shaaKhe.n jhuk kar TuuT ga_ii.n
us baarish hii se fasal uja.Dii jis baarish se taiyaar hu_ii

ab ye bhii nahii.n hai bas me.n ke ham phuulo.n kii Dagar par lauT chale.n
jis raah_guzar par chalanaa hai vo raah_guzar talavaar hu_ii

chhuutii hai zaraa jab tan ko havaa chubhate hai.n rago.n me.n kaa.NTe.n se
sau baar Khizaa.N aa_ii hogii mahasuus magar is baar hu_ii

vo naale hai.n betaabii ke chiiKh uThataa hai sannaaTaa bhii
ye dard kii shab maaluum nahii.n kab tak ke liye bedaar hu_ii

likhii hai.n shikaste.n itanii jahaa.N maqtal me.n vahaa.N ye bhii likh do
kitanii sham_shiire.n TuuT ga_ii.n kitane dushmano.n kii haar hu_ii

ab Gair havaa kitanii hii chale ab garm fizaa kitanii hii rahe
siine kaa zaKhm charaaG banaa daaman kii aag bahaar hu_ii

kare dariyaa na pul mismaar mere

kare dariyaa na pul mismaar mere
abhii kuchh log hai.n us paar mere

[mismaar =destroy]

bahut din guzare ab dekh aa_uu.N ghar ko
kahe.nge kyaa dar-o-diivaar mere

vahii.n suuraj kii nazare.n thii.n ziyaadaa
jahaa.N the pe.D saayaadaar mere

vahii ye shahar hai to shahar vaalo
kahaa.N hai kuuchaa-o-baazaar mere

tum apanaa haal-e-mahajuurii sunaao
mujhe to khaa gaye aazaar mere

[haal-e-mahajuurii=state of separation; aazaar=illness/woes]

jinhe.n samajhaa thaa jaan_paravar mai.n ab tak
vo sab nikale kafan bar_daar mere

[jaan=life; paravar=protector/nourisher]
[kafan-bardaar=shroud bearer]

guzarate jaa rahe hai.n din havaa se
rahe.n zindaa salamaat yaar mere

dabaa jis se usii patthar me.n Dhal kar
bike chehare sar-e-baazaar mere

[sar-e-baazaar=in public]

dariichaa kyaa khulaa merii Gazal kaa
havaaye.n le u.Dii ashaar mere

[dariichaa=window; ashaar=plural of sher (couplet)]

ik intazaar saa thaa ab nazar me.n vo bhii nahii.n

ik intazaar saa thaa ab nazar me.n vo bhii nahii.n
safar me.n marane kii fursat thii ghar me.n vo bhii nahii.n

zaraa malaal kii zulmat ko Taalane ke liye
ka_ii Khayaal the ab to asar me.n vo bhii nahii.n

[malaal = sorrow/anguish; zulmat = darkness; asar = effect]

jo sang-o-Khaar the merii hii gardisho.n tak the
mai.n rah-guzar me.n nahii.n rah-guzar me.n vo bhii nahii.n

[sang = stone; Khaar = thorn]

the chashm-e-baam nagar me.n ajab tuluu ke rang
vo ik nishaat-e-sahar thaa sahar me.n vo bhii nahii.n

[tuluu = dawn; nishaat-e-subah = happiness of dawn]

rahe na kuchh bhii magar ye kaif kyaa kam hai
jis aagahii kii kamii thii hunar me.n vo bhii nahii.n

[kaif = intoxication; aagahii = forewarning; hunar = skill]

rishtaa ye kaisaa hai naataa ye kaisaa hai

rishtaa ye kaisaa hai naataa ye kaisaa hai
pahachaan jis se nahii.n thii kabhii
apanaa banaa hai vahii ajanabii
rishtaa ye kaisaa hai naataa ye kaisaa hai

tumhe.n dekhate hii rahuu.N mai.n
mere saamane yuu.N hii baiThe raho tum
karuu.N dil kii baate.n mai.n Khaamoshiyo.n se
aur apane labo.n se na kuchh bhii kaho tum

ye rishtaa hai kaisaa ye naataa hai kaisaa
tere tan kii Khushbuu bhii lagatii hai apanii
ye kaisii lagan hai ye kaisaa milan hai
tere dil kii dha.Dakan bhii lagatii hai apanii

tumhe.n paake mahasuus hotaa hai aise
ke jaise kabhii ham judaa hii nahii.n the
ye maanaa ke jismo.n ke ghar to naye hai.n
magar hai puraane ye ba.Ndhan dilo.n ke

javaa.N hai raat saqiyaaa sharaab laa sharaab laa

javaa.N hai raat saqiyaaa sharaab laa sharaab laa
zaraa sii pyaas to bujhaa sharaab laa sharaab laa

tere shabaab par sadaa karam rahe bahaar kaa
tujhe lage merii duaa sharaab laa sharaab laa

yahaa.N ko_ii na jii sakaa na jii sakegaa hosh me.n
miTaa de naam hosh kaa sharaab laa sharaab laa

teraa ba.Daa hii shukriyaa pilaaye jaa pilaaye jaa
na zikr kar hisaab kaa sharaab laa sharaab laa

jab naam teraa pyaar se likhatii hai.n u.Ngaliyaa.N

jab naam teraa pyaar se likhatii hai.n u.Ngaliyaa.N
merii taraf zamaane kii uThatii hai.n u.Ngaliyaa.N

daaman sanam kaa haath me.n aayaa thaa ek pal
din raat us ek pal se mahakatii hai.n u.Ngaliyaa.N

jis din se duur ho gaye us din se hii sanam
bas din tumhaare aane ke ginatii hai.n u.Ngaliyaa.N

patthar taraash kar na banaa taaj ek nayaa
fan_kaar kii zamaane me.n kaTatii hai.n u.Ngaliyaa.N

ham-safar ban ke ham saath hai.n aaj bhii

ham-safar ban ke ham saath hai.n aaj bhii
phir bhii hai ye safar ajanabii ajanabii

raah bhii ajanabii mo.D bhii ajanabii
jaaye.n ham kidhar ajanabii ajanabii


zindagii ho ga_ii hai sulagataa safar
duur tak aa rahaa hai dhuaa.N saa nazar

jaane kis mo.D par kho ga_ii har Khushii
deke dard-e-jigar ajanabii ajanabii


hamane chun chun ke ti,nke banaayaa thaa jo
aashiyaa.N hasarato.n se sajaayaa thaa jo

hai chaman me.n vahii aashiyaa.N aaj bhii
lag rahaa hai magar ajanabii ajanabii


kisako maaluum thaa din ye bhii aaye.nge
mausamo.n kii tarah dil bhii badal jaaye.nge

din huaa ajanabii raat bhii ajanabii
har gha.Dii har pahar ajanabii ajanabii

din aa gaye sabaab ke aa.Nchal sambhaaliye

din aa gaye sabaab ke aa.Nchal sambhaaliye
hone lagii hai shahar me.n hal-chal sambhaaliye

chaliye sambhal sambhal ke kaThin raah-e-ishq hai
naazuk ba.Dii hai aap kii paayal sambhaaliye

saj dhaj ke aap nikale sar-e-raah Khair ho
Takaraa na jaaye aap ka paagal sambhaaliye

ghar se naa jaao duur kisii ajanabii ke saath
barasenge zor-zor se baadal sambhaaliye

tere pyaar me.n rusavaa hokar jaaye kahaa.N diivaane log

tere pyaar me.n rusavaa hokar jaaye kahaa.N diivaane log
jaane kyaa kyaa puuchh rahe.n hai.n ye jaane pahachaane log

jaise tumhe.n hamane chaahaa thaa kaun bhalaa yuu.N chaahegaa
maanaa aur bahut aaye.nge tum se pyaar jataane log

kaise dukho.n ke mausam aaye kaisii aag lagii yaaro
ab saharaao.n se laate hai.n phuulo.n ke nazaraane log

kal maatam beqiimat hogaa aaj inakii tauqiir karo
dekho Khuun-e-jigar se kyaa kyaa likhate hai.n afasaane log

[tauqiir=respect]

jaanate hai.n ye ishq musalasal rog hai aah-o-zaarii kaa
phir bhii usake kuuche me.n jaate hai.n umr gavaane log

kuchh ishq thaa kuchh majabuurii thii so mai.n ne jiivan vaar diyaa

kuchh ishq thaa kuchh majabuurii thii so mai.n ne jiivan vaar diyaa
mai.n kaisaa zindaa aadamii thaa ik shaKhs ne mujh ko maar diyaa

ye sajaa sajaayaa ghar saaqii merii zaat nahii.n meraa haal nahii.n
ai kaash kabhii tum jaan sako jo us sukh ne aazaar diyaa

mai.n Khulii hu_ii ik sachchaa_ii mujhe jaanane vaale jaanate hai.n
mai.n ne kin logo.n se nafrat kii aur kin logo.n se pyaar kiyaa

vo ishq bahut mushkil thaa magar aasaan na thaa yuu.N jiinaa bhii
us ishq ne zindaa rahane kaa mujhe zarf diyaa pindaar diyaa

ik sabz shaaKh gulaab kii thaa ik duniyaa apane pyaar kii thaa
vo ek bahaar jo aa_ii nahii.n us ke liye sab kuchh haar diyaa

mai.n rotaa huu.N aur aasmaan se taare TuuTate dekhataa huu.N
un logo.n par jin logo.n ne mere logo.n ko aazaar diyaa

vo yaar ho.n yaa mahabuub mere yaa kabhii kabhii milane vaale
ik lazzat sab ke milane me.n vo zaKhm diyaa yaa pyaar diyaa

kuchh din to baso merii aa.Nkho.n me.n

kuchh din to baso merii aa.Nkho.n me.n
phir Khvaab agar ho jaao to kyaa

koii rang to do mere chehare ko
phir zaKhm agar mahakaao to kyaa

ik aaiinaa thaa so TuuT gayaa
ab Khud se agar sharmaao to kyaa

mai.n tanahaa thaa mai.n tanahaa huu.N
tum aao to kyaa na aao to kyaa

jab ham hii na mahake phir saahib
tum baad-e-sabaa kahalaao to kyaa

jab dekhane vaalaa koii nahii.n
bujh jaao to kyaa jal jaao to kyaa

Khayaal-o-Khvaab hue hai.n muhabbate.n kaisii

Khayaal-o-Khvaab hue hai.n muhabbate.n kaisii
lahuu me.n naach rahii.n hai.n ye vahashate.n kaisii

na shab ko chaa.Nd hai achchhaa na din ko mehar achchhaa
ye ham pe biit rahii hai.n qayaamate.n kaisii

azaab jin kaa tabassum savaab jin kii nigaah
khi.nchii hu_ii hai.n pas-e-jaanaa.N suurate.n kaisii

havaa ke dosh pe rakkhe hue charaaG hai.n ham
jo bujh gaye to havaa se shikaayate.n kaisii

jo beKhabar  ko_ii guzaraa to sadaa ye dii hai
mai.n sang-e-raah huu.N mujh par inaayate.n kaisii

jo aa rahe so vo bhii ab sang-o-Khisht laataa hai
fazaa ye ho to dilo.n kii nazakate.n kaisii

banaa gulaab to kaa.NTe chubhaa gayaa ek shaKhs

banaa gulaab to kaa.NTe.n chubhaa gayaa ik shaKhs
huaa chiraaG to ghar hii jalaa gayaa ik shaKhs

[shaKhs = person]

tamaam rang mere aur saare Khvaab mere
fasaanaa kah ke fasaanaa banaa gayaa ik shaKhs

[tamaam = all/entire; Khvaab = dream; fasaanaa = fictional tale]

mai.n kis havaa me.n u.Duu.N kis fazaa me.n laharaa_uu.N
dukho.n ke jaal har-suu bichhaa gayaa ik shaKhs

[fazaa (fizaa) = environment; har-suu = in all directions]

palaT sakuu.N mai.n na aage ba.Dh sakuu.N jis par
mujhe ye kaun se raaste lagaa gayaa ik shaKhs

muhabbate.n bhii ajiib us kii nafarate.n bhii kamaal
merii tarah kaa hii mujh me.n samaa gayaa ik shaKhs

vo mahataab thaa marham-ba-dast aayaa thaa
magar kuchh aur sivaa dil dukhaa gayaa ik shaKhs

[ba-dast = in hand; sivaa = more]

khulaa ye raaz ke aa_iinaa-Khaanaa hai duniyaa
aur is me.n mujh ko tamaashaa banaa gayaa ik shaKhs

[raaz = secret; aa_iinaa-Khaanaa = glass house]

aziiz itanaa hii rakho ke jii sa.Nbhal jaaye

aziiz itanaa hii rakho ke jii sa.Nbhal jaaye
ab is qadar bhii na chaaho ke dam nikal jaaye

mile hai.n yuu.N to bahut aao ab mile.n yuu.N bhii
ke ruuh garmii-e-a.nfaas se pighal jaaye

muhabbato.n me.n ajab hai dilo.n ko dha.Dakaa saa
ke jaane kaun kahaa.N raastaa badal jaaye

rahe vo dil jo tamannaa-e-taazaa tar me.n rahe
Khushaa vo umr jo Khvaabo.n hii me.n bahal jaaye

mai.n vo charaaG-e-sar-e-rahaguzaar-e-duniyaa huu.N
jo apanii zaat kii tanhaaiiyo.n me.n jal jaaye

har ek lahajaa yahii aarazuu yahii hasarat
jo aag dil me.n hai vo sher me.n bhii Dhal jaaye

dard-e-dil paas-e-vafaa jazbaa-e-imaa.N honaa

dard-e-dil paas-e-vafaa jazbaa-e-imaa.N honaa
aadamiyat yahii hai aur yahii insaa.N hoaa

[dard-e-dil=compassion; paas-e-vafaa=fidelity]
[jazbaa-e-imaa.N=abiding faith; aadamiyat=humanity]

nau-giraftaar-e-balaa tarz-e-fuGaa.N kyaa jaane.n
ko_ii naashaad sikhaa de inhe.n naalaa.N honaa

[nau=new; giraftaar-e-balaa=prisoner of sorrow]
[tarz=style; fuGaa.N=lamentation; naashaad=sad]
[naalaa.N=one who laments]

rah ke duniyaa me.n yuu.N tark-e-havas kii koshish
jis tarah apane hii saaye se gurezaa.N honaa

[tark-e-havas=give up desire; gurezaa.N=to escape from]

zindagii kyaa hai anaasir me.n zahuur-e-tartiib
maut kya hai inhii.n ijzaa kaa pareshaa.N honaa

[anaasir=the five elemets; zahuur=manifestation]
[tartiib=orderly]

dil asiirii me.n bhii aazaad hai aazaado.n kaa
valvalo.n ke liye mumkin nahii.n zindaa honaa

[asiirii=imprisonment; valvale=enthusiasm]

gul ko paamaal na kar laal-o-gauhar ke maalik
hai ise turaah-e-dastaar-e-Gariibaa.N honaa

[gul=flower; paamaal=downtrodden; laal=

hai meraa zabt-e-junuu.N josh-e-junuu.N se ba.Dhakar
nang hai mere liye chaak garebaa.N honaa

[zabt-e-junuu.N=self control]
[josh-e-junuu.N=uncontrolled frenzy; nang=shame]
[chaak=torn; garebaa.N=clothes/dress]

aa bhii jaao kii zindagii kam hai

aa bhii jaao kii zindagii kam hai
tum nahii.n ho to har Khushii kam hai

vaadaa kar ke ye kaun aayaa nahii.n
shahar me.n aaj raushanii kam hai

jaane kyaa ho gayaa hai mausam ko
dhuup ziyaadaa hai chaa.Ndanii kam hai

aa_iinaa dekh kar Khayaal aayaa
aaj kal un kii dostii kam hai

tere dam se hii mai.n mukammal huu.N
bin tere terii 'Yamini' kam hai

rah-e-aashiqii ke maare rah-e-aam tak na pahu.Nche

rah-e-aashiqii ke maare rah-e-aam tak na pahu.Nche
kabhii subah tak na pahu.Nche kabhii shaam tak na pahu.Nche

mujhe mast agar banaa de ye nigaah-e-mast terii
mera haath kyaa nazar bhii kabhii jaam tak na pahu.Nche

mujhe apanii bekasii kaa nahii.n Gam Khayaal ye hai
kahii.n baat ba.Dhate ba.Dhate tere naam tak na pahu.Nche

jo ye daur bevafaa hai tera Gam to mustaqil ho
vo hayaat-e-aashiqii kyaa jo davaam tak na pahu.Nche

[mustaqil=permanent; dawaam=infinity]

ye anokhii bar_hamii hai ke na bhuule se labo.n par
basabiil-e-tazaqiraa bhii mere naam tak na pahu.Nche

[barahamii=injustice; basabiil-e-tazaqiraa=in the course of discussion]

kahii.n is tarah bhii ruuThe na kisii se ko_ii 'Yahya'
ke payaam tak na aaye ke salaam tak na pahu.Nche

josh par phir hai tabiyat tere diivaano.n kii

josh par phir hai tabiyat tere diivaano.n kii
phir chamakane ko hai taqdiir biyaabaano.n kii

TuuTaa TuuTaa saa hai har ek sahaaraa dil kaa
suunii suunii hai duniyaa mere armaano.n kii

saarii duniyaa to chhuuTii tum ne bhii muu.Nh mo.D liyaa
qaabil-e-raham hai haalat mere armaano.n kii

aur hii ruKh hai havaa-e-Gam-e-dil kaa "Yahya"
bahakii bahakii sii hai baate.n tere diivaano.n kii

jahaa.N ban ban ke aas dil kii TuuTii jaatii hai

jahaa.N ban ban ke aas dil kii TuuTii jaatii hai
vahii.n qismat kha.Dii bechaaragii pe muskuraatii hai

Gam-e-ulfat ke haatho.n jo miTaa be-aasaraa ho kar
usii paamaal-e-Gam ko haaye ab duniyaa sataatii hai

kahaa.N rahataa hai qaabuu phir dil-e-naakaam par mujh ko
ke jab rah rah ke tanahaa_ii me.n terii yaad aatii hai

havaa-e-Gam kaa muntazar huu.N vafuur-e-shauq me.n 'Yahya'
magar ab dekhiye un kii tajallii kyaa dikhaatii hai

jaan-e-sukuun aa bhii jaa teraa hii intazaar hai

jaan-e-sukuun aa bhii jaa teraa hii intazaar hai
aa.Nkho.n se ashk hai ravaa.N jaa.N bhii beqaraar hai

hone ko fasl-e-gul bhii hai daavat-e-aish hai magar
apanii bahaar kaa mujhe aaj bhii intazaar hai

saare sahaare ishq ke TuuT chuke hai.n hijr me.n
ek tumhaarii yaad bas dard kii Gam-gusaar hai

ahad-e-vafaa kaa aap ke lutf-o-karam kaa aap ke
aur kisii ko ho na ho mujh ko aitabaar hai

luT ga_ii Gam kii aabaruu luT chukii dil kii aarazuu
'Yahya' nigaah-e-lutf kaa phir bhii ummiid_vaar hai

ek bekasii hai hijr ke maaro.n ke saath saath

ek bekasii hai hijr ke maaro.n ke saath saath
TuuTaa hai meraa dil bhii sahaaro.n ke saath saath

jii bhar ke dekhane bhii na paaye the chhup gaye
armaa.N bhii hai.n udaas nazaaro.n ke saath saath

dil me.n vafuur-e-shauq kaa tuufaa.N liye huye
Khaamosh jaagataa huu.N sitaaro.n ke saath saath

itanii to mahviyat ho tasavvur me.n tere dost
Khud ko bhii bhuul jaa_uu.N nazaaro.n ke saath saath

"Yahya" ye aag ishq kii phir bhii na bujh sakii
hai dil me.n ashk-e-Gam bhii sharaaro.n ke saath saath

dil kii lagii ko aur vo bha.Dakaa rahe hai.n aaj

dil kii lagii ko aur vo bha.Dakaa rahe hai.n aaj
sar taa paa bahaar bane jaa rahe hai.n aaj

jaise ke ho rahaa hai tuluu aaftaab-e-naaz
kuchh aisii shaan se vo chale aa rahe hai.n aaj

Thukaraa ke iltajaa ko paa-e-Guruur se
armaano.n kaa vo Khuun kiye jaa rahe hai.n aaj

vo pyaar kii fizaaye.n vo rangiin sohabate.n
manzar vo saare shauq ke yaad aa rahe hai.n aaj

"Yahya" gilaa kare.n bhii to kis baat kaa kare.n
apane kiye kii aap sazaa paa rahe hai.n aaj

mujhe dil kii Khataa par 'Yaas' sharmaanaa nahii.n aataa

mujhe dil kii Khataa par 'Yaas' sharmaanaa nahii.n aataa
paraayaa jurm apane naam likhavaanaa nahii.n aataa

buraa ho paa-e-sar_kash kaa ki thak jaanaa nahii.n aataa
kabhii gum_raah ho kar raah par aanaa nahii.n aataa

[paa-e-sar_kash=disobedient feet]

mujhe ai naaKhudaa aaKhir kisii ko muu.Nh dikhaanaa hai
bahaanaa kar ke tanhaa paar utar jaanaa nahii.n aataa

[naaKhudaa=boatsman]

musiibat kaa pahaa.D aaKhir kisii din kaT hii jaayegaa
mujhe sar maar kar teshe se mar jaanaa nahii.n aataa

[teshe=axe]

asiiro shauq-e-aazaadii mujhe bhii gud_gudaataa hai
magar chaadar se baahar paa.Nv phailaanaa nahii.n aataa

[asiiro=prisoners]

dil-e-behausalaa hai ik zaraa sii Tiis kaa meh_maa.N
vo aa.Nsuu kyaa piyegaa jis ko Gam khaanaa nahii.n aataa

kahii.n aisaa naa ho daaman jalaa lo

kahii.n aisaa naa ho daaman jalaa lo
hamaare aa.Nsuo.n par Khaak Daalo

manaanaa hii zaruurii hai to phir tum
hame.n sab se Khafaa hokar manaa lo .

bahut ro_ii hu_ii.n lagatii hai.n aa.Nkhe.n
merii Khaatir zaraa kaajal lagaa lo

akelepan se Khauf aataa hai mujh ko
kahaa.N ho ai mere Khvaabo.n Khayaalo.n

bahut maayuus baiThaa huu.N mai.n tum se
kabhii aakar mujhe hairat me.n Daalo

zaraa chehare se kamalii ko haTaa do yaa rasuulallaah

zaraa chehare se kamalii ko haTaa do yaa rasuulallaah
hame.n bhii apanaa diivaanaa banaa do yaa rasuulallaah

muhabbat Gair se merii chhu.Daa do yaa rasuulallaah
merii so_ii hu_ii qismat jagaa do yaa rasuulallaah

ba.Dii qismat hamaarii hai ki ummat me.n tumhaarii hai.n
bharosaa diin duniyaa me.n tumhaaraa yaa rasuulallaah

andherii qabr me.n mujh ko akelaa chho.D jaaye.nge
vahaa.N ho fazl se tere ujaalaa yaa rasuulallaah

Khudaa mujh ko madiine me.n jo pahu.Nchaaye to bahatar hai
ki rauze par hii de duu.Ngaa jaa.N tak yaa rasuulallaah

ye alag baat hai saaqii ki mujhe hosh nahii.n

ye alag baat hai saaqii ki mujhe hosh nahii.n
hosh itanaa hai ki mai.n tujh se faraamosh nahii.n

mai.n terii mast nigaaho.n kaa bharam rakh luu.Ngaa
hosh aayaa bhii to kah duu.Ngaa mujhe hosh nahii.n

yaad itanaa hai ki pahu.Nchaa dar-e-maiKhaane tak
kyaa kahuu.N aage ki aage kaa mujhe hosh nahii.n

kabhii un mad_bharii aa.Nkho.n se piyaa thaa ik jaam
aaj tak hosh nahii.n hosh nahii.n hosh nahii.n

us ne jab tyorii badal kar baat kii

us ne jab tyorii badal kar baat kii
miT ga_ii duniyaa merii jazbaat kii

tum ne shiishe pe jhuk kar baat kii
vo uThii kaalii ghaTaa barasaat kii

dil kii dha.Dakan ba.D rahii hai har nafas
tez hai raftaar paiGaamaat kii

tum mere duniyaa merii uqbaa merii
ab kamii mujh ko bhalaa kis baat kii

ro diye ham dekh kar suu-e-falak
us ne ha.Ns kar jab kisii se baat kii