Darate hai.n chashm-o-zulf, nigaah-o-adaa se ham

Darate hai.n chashm-o-zulf, nigaah-o-adaa se ham
har dam panaah maa.Ngate hai.n har balaa se ham

maashuuq jaaye huur mile, may bajaaye aab
mahashar me.n do savaal kare.nge Khudaa se ham

go haal-e-dil chhupaate hai.n par is ko kyaa kare.n
aate hai.n Khud Khud nazar ik mubatalaa se ham

dekhe.n to pahale kaun miTe usakii raah me.n
baiThe hai.n shart baa.ndh ke har naqsh-e-paa se ham